టీఆర్‌ఎస్‌ పాలనలో తెలంగాణలో ఎక్కడైనా కర్ఫ్యూ పెట్టే పరిస్థితి వచ్చిందా? Kukatpally constituency

0
72

తెలంగాణలో అమలు చేస్తున్న ఒక్క పథకమైనా బీజేపీ పాలిత రాష్ట్రాల్లో ఉందా? అని కేటీఆర్‌ ప్రశ్నించారు. గుడ్డిగా ఆరోపణలు చేయడం కాదని.. ఆధారాలు చూపెట్టాలని ఆయన సవాల్‌ విసిరారు. ఆయుష్మాన్‌ భారత్‌ కంటే ఆరోగ్యశ్రీ మంచి పథకమని కేటీఆర్‌ చెప్పారు. తెలంగాణ రాష్ట్రం అమలు చేస్తున్న పథకాలనే కేంద్రం కాపీ కొడుతోందని ఎద్దేవా చేశారు. రాష్ట్రంలో ఏడాదికి రూ.12 వేల కోట్లు పింఛన్లుగా ఇస్తుంటే.. కేంద్రం ఇచ్చేది కేవలం రూ.200 కోట్లు మాత్రమే అని తెలిపారు. 

కులాల మధ్య, మతాల మధ్య చిచ్చుపెట్టి, ఆ సెగతో కాపుకోవాలని బీజేపీ చూస్తోందని కేటీఆర్ మండిపడ్డారు. టీఆర్‌ఎస్‌ పాలనలో తెలంగాణలో ఎక్కడైనా కర్ఫ్యూ పెట్టే పరిస్థితి వచ్చిందా? అని ఆయన ప్రశ్నించారు. ‘సంక్షేమ కార్యక్రమాలు ఇంత పెద్ద ఎత్తున అమలు చేస్తున్న ప్రభుత్వం దేశంలో ఎక్కడైనా ఉందా? హైదరాబాద్‌ అభివృద్ధికి గత ఐదేళ్లలో మోదీ ప్రభుత్వం చేసిందేంటి?’ అని కేటీఆర్ ప్రశ్నించారు. 

‘తెలంగాణ అడ్డాలో నడ్డా నాటకాలు నడవవు. ఇతర రాష్ట్రాల్లో వేసిన ఎత్తుగడలు తెలంగాణలో వేస్తే ఊరుకోం. బీజేపీ నేతలు అధికార మత్తులో నోటికొచ్చినట్లు మాట్లాడుతున్నారు. వాటిని ఏమాత్రం సహించేది లేదు. కర్ణాటకలో బీజేపీ చేసిన నాటకాలు ఇక్కడ సాగవు. ఇది కర్ణాటక కాదు.. తెలంగాణ అని బీజేపీ నేతలు గుర్తుంచుకోవాలి’ అని కేటీఆర్‌ ధ్వజమెత్తారు. 

‘నీళ్లు, నిధులు, నియామకాల్లో జరిగిన అన్యాయాన్ని సరి చేసుకోవడానికే తెలంగాణ రాష్ర్టాన్ని సాధించుకున్నాం. ప్రాజెక్టుల నిర్మాణాలకు సహకరించాల్సింది పోయి విమర్శించడం సరికాదు. మిషన్‌ కాకతీయకు రూ.5 వేల కోట్లు ఇవ్వాలని నీతి ఆయోగ్‌ సిఫారసు చేస్తే కేంద్రం ఎందుకు పట్టించుకోలేదు. మిషన్‌ కాకతీయను నీతి ఆయోగ్‌ ప్రశంసిస్తే.. మీకు కనిపించడం లేదా బీజేపీ పాలిత రాష్ర్టాల మంత్రులు, అధికారులు తెలంగాణ పథకాలను ప్రశంసిస్తుంటే.. నడ్డాకు కనిపించడం లేదా?’ అని కేటీఆర్ ప్రశ్నించారు. 

కేంద్రంలో అధికారంలో ఉన్న బీజేపీ బాధ్యతాయుతంగా మాట్లాడాలని కేటీఆర్ హితవు పలికారు. ఆయుష్మాన్‌ భారత్‌ కంటే ఆరోగ్య శ్రీ చాలా మెరుగైన పథకమని స్పష్టం చేశారు. పింఛన్లపై బీజేపీ నేతలు దుష్ప్రచారం చేస్తున్నారని మండిపడ్డారు. దేశంలో ఎక్కడా లేని విధంగా కల్యాణ లక్ష్మిని అమలు చేస్తున్నామని తెలిపారు. బీజేపీ పాలిత రాష్ర్టాల్లో ఎక్కడైనా 24 గంటల కరెంటు ఇస్తున్నారా? అని ప్రశ్నించారు. 

కాంగ్రెస్‌ నేతలు అవినీతి అంటూ కాకిగోల పెడుతున్నారని కేటీఆర్ ఎద్దేవా చేశారు. క్రమశిక్షణ కలిగిన నాయకులు, కార్యకర్తలే టీఆర్‌ఎస్ బలమని అన్నారు. ఇప్పటి వరకు 50 లక్షల మంది టీఆర్‌ఎస్ సభ్యత్వం తీసుకున్నారని వెల్లడించారు. ఈ కార్యక్రమంలో మంత్రులు మల్లారెడ్డి, శ్రీనివాస్‌ గౌడ్‌, ఎమ్మెల్యే కృష్ణారావు, ఎమ్మెల్సీలు శంభీపూర్‌ రాజుతో పాటు ఇతర నాయకులు పాల్గొన్నారు. 

LEAVE A REPLY

Please enter your comment!
Please enter your name here